انا جيبالكوا انهاردة طرق لعمل القطايف طبعا كلكوا ممكن تقولوا ايه طرق القطايف دي حاجة كلنا نعرفها.بس الطرق اللي انا جيباها ممكن تكون غريبة لشوية منكم لانها بالنسبة لي كانت غريبة لما عرفتها بس عجبتني اوي لما دوقتها عشان كده انا جبتلكوا الطريقة بتاعتها.
انا جايبة 4 طرق 2منهم حوادق تنفع علي الفطار واتنين منهم في الحلو بعد الفطار.
نشوف مع بعض الطريقة متقلقوش سهلة جدا.
القطايف الحادقة:ممكن تتعمل بالجبنة الرومي والزيتون.تقطعي جبنه رومي لحتت صغيرة وتقطعي فوقيها زيتون اسود وممكن تحطي شوية شطة لو عايزة.
وبعديت تحشي القطايف وتقليها في الزيت وتاكليها بالهنا والشفا.
والطريقة التانية بالجبنة البيضا.
تحطي جبنة بيضا في طبق وتقطعي عليها زيتون وتحطي عليها شويه زعتر بتاع التوابل وتهرسيهم بمعلقة مع بعض وتحشي القطايف وتقليها.
ودول بيبقوا علي الفطار زي مقبلات او مشهيات يعني.
اما القطايف الحلوة فبرضوا ليها طريقتين:ممكن تكون بالجبنه الروكيته ودي بتبقي جبهة زي القشطة مخصوص للحلويات وبتتباع في اي حته.
تحطيها في طبق وتحطي عليها شوية سكر وتهرسيهم مع بعض وتحشيها وبعد متقليها حطيها في العسل شوية لحد متتشرب.
او ممكن تكون محشية بالمكسرات:يعني تحمري اللوز والبندق وعين الجمل وتحطي عليهم سكر وجوز الهند وافرميهم في الخلاط و حطيهم في كيس ورجيهم عشان يتخلطوا كلهم علي بعض وبعدين احشي القطايف واقليها وحطيها في العسل لحد متتشرب.
وبالهنا والشفا.
